Fransada ən azı 350 supermarketin soyutma sistemini sıradan çıxaran hakerlərin axtarışına başlanılıb. Kiberhücum nəticəsində çoxlu sayda ərzaq məhsulu yararsız hala düşüb.
“Reuters” agentliyinin məlumatına görə, hücum “Carrefour”, “Monoprix”, “Intermarché” və “Coopérative U” supermarket şəbəkələrinə təsir edib. Hakerlər soyuducu qurğuların temperatur parametrlərini əl ilə dəyişmək imkanı əldə ediblər. Nəticədə bəzi mağazalarda ət və dondurulmuş məhsullar atılmalı olub.
Fransalı müstəntiqlər indiyədək hücuma görə məsuliyyəti üzərinə götürən hər hansı haker qrupunu müəyyən edə bilməyiblər. Kibercinayətkarların pul tələbi ilə çıxış etməməsi də araşdırma aparanları təəccübləndirib.
Kibertəhlükəsizlik üzrə mütəxəssislərin ilkin qiymətləndirməsinə görə, hücumun həyata keçirilməsi nisbətən asan olub. Zərərçəkən soyutma sistemlərində Danimarkanın “Danfoss” şirkətinin proqram təminatından istifadə edilib. Şirkət daha əvvəl bir sıra cihazların istismar müddətini başa vurduğunu, onların proqram və təhlükəsizlik yeniləmələrini artıq almadığını və ya köhnəlmiş proqram təminatı ilə işlədiyini bildirmişdi.

Avqust ayında “Claroty” şirkəti “Danfoss”un AK-SM 800A nəzarət cihazında təhlükəsizlik boşluqları barədə məlumat yayıb. Həmin boşluqların hücumçulara autentifikasiya mexanizmini keçmək və ələ keçirilmiş cihazlarda öz kodlarını icra etmək imkanı yarada biləcəyi qeyd olunub. Sonradan bu zəifliklərin aradan qaldırıldığı bildirilib.

Hücumun sistemlərə hansı üsulla həyata keçirildiyi hələlik rəsmi şəkildə açıqlanmayıb. Bununla belə, ekspertlər ehtimal edirlər ki, hakerlər köhnəlmiş proqram təminatından və internet üzərindən əlçatan olan idarəetmə interfeyslərindən istifadə etmiş ola bilərlər.

“Pen Test Partners” şirkətinin kibertəhlükəsizlik üzrə mütəxəssisi Ken Munronun sözlərinə görə, bu hadisə elementar kibertəhlükəsizlik qaydalarına əməl edilməməsinin ciddi nəticələrə səbəb ola biləcəyini göstərir. Qorunmayan avadanlıqlara müdaxilə ərzaq itkisi ilə yanaşı, əhəmiyyətli maliyyə zərərinə də gətirib çıxara bilər.

“Reuters” agentliyinin internetə qoşulmuş cihazları aşkarlayan “Shodan” xidməti vasitəsilə apardığı yoxlama zamanı “Danfoss”un internetdən əlçatan olan ən azı 4500 idarəetmə interfeysi aşkarlanıb. Agentlik onların neçəsinin həssas proqram təminatından istifadə etdiyini müstəqil şəkildə müəyyənləşdirə bilməyib.

İnternet infrastrukturunu təhlil edən Fransanın “Onyphe” şirkəti isə aşkarlanan cihazların yalnız kiçik bir hissəsinin proqram təminatının son versiyası ilə işlədiyini bildirib.

Hadisə internetə qoşulan sənaye və ticarət avadanlıqlarının təhlükəsizliyinin vacibliyini bir daha gündəmə gətirib. Mütəxəssislər sistemlərin mütəmadi yenilənməsini, köhnəlmiş avadanlıqların dəyişdirilməsini və internet üzərindən idarəetməyə çıxışın etibarlı şəkildə qorunmasını tövsiyə edirlər.