Azərbaycan İlahiyyat İnstitutunun (Aİİ) psixoloqu İlkin Kazımlının tələbələrlə imtahanqabağı onlayn görüşü təşkil olunub.
İ.Kazımlı tələbələrin əsasən imtahan zamanı bir sıra psixoloji və fiziki problem yaşadıqlarını qeyd edib. O, imtahan gərginliyini aradan qaldıran bir sıra üsuldan bəhs edib. Vurğulayıb ki, planlı olaraq imtahana hazırlaşmaq, daxili motivasiya vacibdir. “Stress imtahana girən hər bir şəxs üçün təbii haldır. Orta səviyyədə hiss edilən narahatlıq tələbələri daha çox motivasiya edərək oxumağa həvəsləndirir, onları daha məsuliyyətli olmağa yönləndirir”, – deyə psixoloq qeyd edib.

Psixoloq, həmçinin imtahana hazırlıq zamanı tələbələrin diqqət edəcəkləri məqamları da nəzərə çatdırıb. Bildirib ki, vaxtın səmərəli bölgüsü, gündəlik iş qrafiki, planlı çalışmağın təmin edilməsi vacib məqamlardandır.
Görüş zamanı tələbələri narahat edən əsas psixoloji amillərə toxunulub və qarşılıqlı müzakirə əsasında təhsilalanların sualları psixoloq tərəfindən cavablandırılıb.
Məlumat üçün bildirək ki, xüsusi karantin dövründə tələbələrin onlayn dərslərdə fəal iştirak etmələri, pandemiya dövründə stressdən uzaq qalmaq və xüsusi karantin rejiminə adaptasiya ilə bağlı problem yaşayan tələbələrlə psixoloq mütəmadi olaraq onlayn görüşlər keçirir.
Yay imtahan sessiyası dövründə İ.Kazımlının problemli tələbələrlə fərdi onlayn konsultasiyalar keçirməsi də nəzərdə tutulub.