Dövlət Gömrük Komitəsinin “Azərterminalkompleks” birliyinin direktoru, general-mayor Ehtiram Xəlilov barəsində iddialar səslənməkdədir.

Cahan.info xəbər verir ki, E.Xəlilov onun karyera yüksəlişinə səbəb olmuş fövqəladə hallar naziri Kəmaləddin Heydərovla yolları ayırmalı olub.

Dövlət Gömrük Komitəsinin yeni sədri Səfər Mehdiyevin E.Xəlilov qarşısında qoyduğu ağır şərtlərdən biri K.Heydərovla onun arasında seçim etməsi olub.

"Azərterminalkompleks” birliyinin direktoru bir zamanlar K.Heydərovun ən yaxın adamlarından imiş və iddialara görə, FHN rəhbərinin məclislərinin tərtibatçısı funskiyasını yerinə yetirib.

Bu haqda AzEuroNews.com-un verdiyi xəbərdə bildirilir ki, general paqonunu da ona elə K.Heydərov hədiyyə edib. Ancaq DGK-nin hazırkı sədri E.Xəlilovdan açıq mövqe tələb edib. Son dövrlər süqutunu yaşamaqda olduğu görünən nazirin mövqelərinin sarsılması E.Xəlilovu praqmatik qərar verməyə vadar edib.

Xəbərə görə, S.Mehdiyev E.Xəlilovu çağıraraq ya ərizə yazmağı, ya K.Heydərovla əlaqələri kəsməyi tapşırıb. Generalın ikincini seçdiyi iddiası var.

Qeyd edək ki, o, Aksiz Baş Gömrük idarəsinin rəisi vəzifəsində çalışıb. Bundan əvvəl isə Sumqayıt gömrüyünə rəhbərlik edib.

Cahan.info aktual.az-a istinadla xəbər verir ki, Ehtiram Xəlilovun İlqar Əliyevin yüksəlməsində müstəsna rolu olduğu üzə çıxıb. Gömrük generalı nüfuzundan istifadə edərək Eldar Mahmudovdan ona şərait yaradılmasını istəyibmiş.

Və İlqar Əliyev qısa müddətdə şöbə rəisinin müavini, şöbə rəisi, nəhayət, idarə rəisinin müavini təyinatları alıb. Bu həmin İlqar Əliyevdir ki, MTN olayı zamanı həbs olunmuşdu. Bir müddət həbsxanada qalaraq, orada intihar etmişdi.

Göyçayda E.Xəlilova məxsus olduğu deyilən "Çərəkə Gölü" istirahət mərkəzi İlqar Əliyevin qardaşı Mustafa Əliyev tərəfindən idarə olunur.

Qaynar.info-nun dəqiqləşdirmələrindən sonra məlum olub ki, Çərəkə kəndi ərazisində 1975-ci ildən fəaliyyətə başlayan "Çərəkə gölü” istirahət zonası təbii gölün ətrafında yerləşir və hektarlarla ərazini əhatə edir.

Doğrudan da bu istirahət mərkəzi əvvəllər başqa bir sahibkara məxsus olub, amma sonra obyektin sahibi müəmmalı şəkildə həbs olunur və gömrük generalı Çərəkə gölünü və istirahət mərkəzini ələ keçirir.

Regionxeberleri.com yazmışdı ki, Səfər Mehdiyev və Ehtiram Xəlilov bir vaxtlar aksizli malların qaçaqmal yolu ilə ölkyə gətirilməsini, həmçinin satışına nəzarəti həyata keçirirdilər. Hər iki general bu qeyri-rəsmi "biznes”dən hər ay yüz min manatlarla gəlir əldə edirdilər.

Səfər Mehdiyev və Ehtiram Xəlilova aid olan "TIR”lar Rusiyadan, (Dağıstandan), spirtli içkilər gətirirlər. Həmin "TIR”ların malları bir qayda olaraq sərhəd keçid məntəqəsində qeydiyyata alınmırlar.

Bu əlaqələrdən və gedişatdan yaxşı nəticə çıxaran E.Xəliov S.Mehdiyevi seçərək, K.Heydərovdan qopmağa qərar veribmiş.

Qarşı tərəfin mövqeyini dərc edə bilərik.