Əsasən azərbaycanlı tələbələrdən ibarət DroneX komandası Türkiyənin Bursa şəhərində keçirilən “Technofest 2023” aerokosmik və texnologiya festivalında qızıl medala və kuboka layiq görülüb.
Azadmedia.az xəbər verir ki, komanda aprelin 24-30-da Türkiyədə keçirilən festival çərçivəsində təşkil olunan beynəlxalq PUA müsabiqəsində yüksək mükafat alıb. İstedadlı tələbələrin qələbəsini onların təqdim etdikləri, Azərbaycanın Milli Qəhrəmanı Mübariz İbrahimovun adını daşıyan “Mübariz” pilotsuz uçan aparatı gətirib.

İstanbul Yıldız Texniki Universitetinin Elektronika və Kommunikasiya fakültəsinin tələbələrinin də yer aldığı DroneX komandası 100-dən çox komandanın mübarizə apardığı final mərhələsində yüksək nəticə göstərərək ümumi hesabda qızıl medala layiq görülüb.

Komandanın kapitanı Davud Süleymanov böyük əməyin qiyməti olan mükafatın Milli Qəhrəman Mübariz İbrahimovun və bütün Azərbaycan şəhidlərinin əziz xatirəsinə həsr olunduğunu qeyd edib.

Mükafat qalib komandaya 30 aprel bazar günü veriləcək.