Fransada oktyabr iğtişaşlarının vurduğu zərər 207 milyon avroya çata bilər

Fransada oktyabr iğtişaşlarının vurduğu zərər 207 milyon avroya çata bilər
Fransada oktyabrın 17-də keçirilən nümayişlər zamanı baş verən iğtişaşların vurduğu sığortalanmış zərərin ümumi məbləği 207 milyon avroya çata bilər.
France Assureurs Sığortaçılar Federasiyasının noyabrın 12-dək olan məlumatlar əsasında açıqladığı ilkin hesablamalara görə, hadisələrlə bağlı ümumilikdə 5 min 280 sığorta müraciəti qeydə alınıb.
Zərərin 95 faizindən çoxu, yəni 198 milyon avrosu müəssisə və sahibkarların əmlakına dəyib. Bu kateqoriya üzrə 4 min 50 sığorta hadisəsi qeydə alınıb. Fiziki şəxslərin əmlakına dəyən zərərin 3,5 milyon avroya çatacağı, zədələnmiş avtomobillər üzrə itkilərin isə təxminən 6 milyon avro təşkil edəcəyi gözlənilir.
France Assureurs-un prezidenti Florans Lüstman bildirib ki, oktyabrın 17-də gündüz saatlarında və 18-nə keçən gecə baş verən iğtişaşların qısa müddət davam etməsinə baxmayaraq, vurduğu zərər xüsusilə böyük olub.
Federasiyanın məlumatına görə, müqayisə üçün, 2005-ci ildə Fransada baş verən iğtişaşlar dörd həftə ərzində 209 milyon avro, 2018–2019-cu illərdəki “Sarı jiletlilər” etirazları isə bir neçə ay ərzində 256 milyon avro sığortalanmış zərərə səbəb olub.
Mətndə səhv var? Onu siçanla seçin və Ctrl+Enter düyməsini basın.