AzadMedia
Telegram Facebook Twitter Youtube Instagram

Masallı rayonu Ağakişibəyli kənd Şəhidi Polkovnik-leytenant Ramiz Cəfərovun xatirəsinə “Şuşa qartalı” adlı ədəbi-bədii kompozisiya səhnələşdirilib - FOTO

  • + A
  • - A
  • 8-12-2021, 22:22




    Masallı rayonu Ağakişibəyli kəndinin Vətən müharibəsi qəhrəmanı, Şəhid Polkovnik-leytenant Ramiz Cəfərovun əziz xatirəsinə ithaf olunan “Şuşa qartalı” adlı ədəbi-bədii kompozisiya təşkil edilib.

    Azadmedia.az-ın cənub bürosunun verdiyi məlumata görə, 08 dekabr 2021-ci il tarixdə 44 günlük Vətən müharibəsində igidliklə döyüşərək şəhidlik zirvəsinə ucalmış Azərbaycan Xüsusi Təyinatlı Qüvvələrinin polkovnik-leytenantı, Vətən müharibəsi Qəhrəmanı, şəhid Ramiz Sübhan oğlu Cəfərovun xatirəsinə yazıçı-publisist, “İKİ SAHİL” qəzetinin müxbiri Nurəddin Ədiloğlunun ithaf etdiyi "Şuşa qartalı" adlı onlayn ədəbi-bədii kompozisiya səhnələşdirilib.


    Belə ki, Masallı Xalq Teatrının yaradıcı qrupu və Masallı Dövlət Regional Kollecinin müəllim və tələbələrinin birgə əməkdaşlığı ilə ərsəyə gələn teatr kompozisiyası şəhər Mədəniyyət Mərkəzində nümayiş edilib.


    Tədbirdə Masallı Rayon İcra Hakimiyyətinin başçısı Şahin Məmmədov, hüquq-mühafizə orqanlarının rəhbərləri, Masallı Regional Mədəniyyət İdarəsinin rəisi Bəxtiyar Qılıncov, Millət vəkili Məşhur Məmmədovun köməkçisi Rəmzi Şahverdiyev, şəhid ailələri, qazilər, Masallı Dövlət Regional Kollecinin müəllim və tələbə heyəti, Bakı və Sumqayıt şəhərlərindən qonaqlar, media və ictimaiyyət nümayəndələri iştirak ediblər.


    Əvvəlcə şəhidlərimizin xatirəsi bir dəqiqəlik sükutla yad olunub.

    Masallı Rayon İcra Hakimiyyətinin təsisçiliyi ilə nəşr olunan “Yeni həyat” qəzetinin əməkdaşı tədbir keçirilən Masallı şəhər Mədəniyyət Mərkəzindən xəbər verir ki, şəhid polkovnik-leytenant Ramiz Cəfərovun həyat yoldaşı Sitarə Cəfərova ömür-gün yoldaşının Vətənə xidmətlərindən danışıb. O, çıxışını belə yekunlaşdırıb: “Vətən sağ olsun! Qarabağ Azərbaycandır!”

    Tamaşadan sonra Masallı RİH başçısı Şahin Məmmədov, Masallı Regional Mədəniyyət İdarəsinin rəisi Bəxtiyar Qılıncov və digər rayon rəsmiləri şəhid valideynləri, onların övladları ilə görüşmüşlər. Sitarə xanım və övladları Nurlan ölkə başçısına və rayon rəhbərinə minnətdarlıq ifadə ediblər.

    Ramiz Cəfərov 10 dekabr 1974-cü ildə Ukraynanın Makeyevka şəhərində (Donetsk vilayəti) anadan olub. Əslən Ağakişibəyli kəndindəndir.

    1981-1985-ci illərdə Sumqayıt şəhərində 17 nömrəli tam orta məktəbdə, 1985-1989-cu illərdə Sumqayıt şəhərində 11 nömrəli tam orta məktəbdə, 1989-1992-ci illərdə isə Cəmşid Naxçıvanski Hərbi Liseydə təhsil alıb. 1992-1996-cı illərdə V. F. Marqelov adına "Suvorov" ordenli Ryazan Qvardiya Ali Hava-Desant Komandanlığı Məktəbində ali hərbi təhsil alıb.

    Alman, ingilis və rus dillərini bilirdi.

    Ramiz Cəfərov, 2004-cü ildə martın 1-dən martın 20-nə qədər Birləşmiş ştatlarda baş tutan NATO-nun "Əməliyyat heyəti zabitləri" Kursunda olmuşdur.

    2016-cı il aprelin 1-dən 2-nə ötən gecədən başlayaraq Azərbaycan və Ermənistan Silahlı Qüvvələrinin bölmələri arasında cəbhənin Tərtər və Cəbrayıl-Füzuli istiqamətlərində şiddətli döyüşlər başlamışdır. Tarixə Aprel döyüşləri olaraq yazılan döyüşlər zamanı Ramiz Cəfərov, cəbhənin Cəbrayıl rayonu istiqamətində gedən döyüşlərdə savaşmışdır. Gecə döyüşləri zamanı Cəbrayıl rayonunun Lələtəpə istiqamətində olan əlverişli mövqelər, strateji nöqtələr, o cümlədən Lələtəpə zirvəsi Azərbaycan Ordusu tərəfindən işğaldan azad olunmuşdur. Həmin döyüşlərdə Ermənistanın müdafiə naziri Seyran Ohanyan tərəfindən qurulan və Ermənistan Ordusunun "yenilməz Ohanyan xətti" olaraq tanınan müdafiə xətti 40 dəqiqə ərzində darmadağın edilmişdir.

    2020-ci il sentyabrın 27-də başlanan Vətən müharibəsində Azərbaycan Xüsusi Təyinatlı Qüvvələrin sıralarında tabeliyində olan hərbi qulluqçularla Cəbrayıl rayonu və Şuşa rayonu istiqamətlərində gedən döyüşlərdə savaşmışdır.

    Ümumi olaraq 40 gün ərzində bir sıra yaşayış məntəqələrinin, həmçinin əlverişli mövqelərin və strateji nöqtələrin azad edilməsi uğrunda gedən döyüşlərdə olmuşdur.

    Noyabrın 6-da Şuşa istiqamətində şəhid olmuşdur.

    Ramiz Cəfərov ailəli idi, Rəbiqə, Nigar, Nərgiz, Nurlana adında dörd qızı və Nurlan adında oğlu yadigar qaldı.

    Azərbaycan Ordusunun polkovnik-leytenantı olan Ramiz Cəfərov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Şuşanın azadlığı uğrunda gedən döyüşlərdə savaşıb.

    Ramiz Cəfərov noyabrın 6-da Şuşa döyüşləri zamanı şəhid olub.

    II Şəhidlər Xiyabanında dəfn olunub.

    Azərbaycanın ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zamanı igidliyin və mərdliyin nümayiş etdirilməsinə görə Azərbaycan Prezidenti cənab İlham Əliyevin 9 dekabr 2020-ci il tarixli Sərəncamına əsasən Vətən Müharibəsi Qəhrəmanı, 15 dekabr 2020-ci il tarixli Sərəncamına əsasən “Vətən uğrunda”, 24 dekabr 2020-ci il tarixli Sərəncamına əsasən “Cəbrayılın azad olunmasına görə”, 29 dekabr 2020-ci il tarixli Sərəncamına əsasən “Şuşanın azad olunmasına görə”, 24 iyun 2021-ci il tarixli sərəncamlarına əsasən “Füzulinin azad olunmasına görə” və “Xocavəndin azad olunmasına görə” medalları ilə təltif edilib.

    Allah bütün şəhidlərimizə rəhmət eləsin!

    Ülkər Piriyeva


    www.AzadMedia.az

    Mətndə səhv var? Onu siçanla seçin və Ctrl+Enter düyməsini basın.
    OXŞAR XƏBƏRLƏR

    Köşə
    XƏBƏR LENTİ
    BÜTÜN XƏBƏRLƏR