Birləşmiş Millətlər Təşkilatının (BMT) baş katibi Antonio Quterreş Qəzzada dinc əhalinin öldürülməsinə görə narahat olduğunu bildirib və humanitar atəşkəslə bağlı çağırış edib.

Azadmedia.az xəbər verir ki, mövzu ilə bağlı BMT-dən verilən yazılı açıqlamada bildirilib.

Belə ki, açıqlamada A.Quterreşin oktyabrın 7-də İsrailə edilən hücumu pislədiyi və bütün girovların dərhal və qeyd-şərtsiz azad edilməsi ilə əlaqədar çağırış etdiyi qeyd olunub.

"Baş katib Qəzzada dinc əhalinin öldürülməsi və Qəzzada baş verən humanitar fəlakətə görə narahatdır'', - bəyanatda deyilir.

''Həmas''ın silahlı qanadı İzzəddin əl-Qəssam Briqadaları İsrailin fələstinlilərə və onların müqəddəs dəyərlərinə qarşı davamlı pozuntularına cavab olaraq oktyabrın 7-də səhər saatlarında hərtərəfli hücuma keçib. İsrail qüvvələri də buna cavab olaraq Qəzza zolağına intensiv hücumlara başlayıb.

Qeyd edək ki, İsrail rəsmiləri Qəzzadan həyata keçirilən hücumlarda 315-i əsgər olmaqla 1400 israillinin öldüyünü, 5132 nəfərin də yaralandığını açıqlayıb.