Əksər yaşlı kişilərdə simptomlar olmadığı müddətcə prostat xərçəngi üçün müayinəyə ehtiyac yoxdur. Bu barədə Annals of Internal Medicine (AIM) jurnalında dərc olunan araşdırmanın müəllifləri məlumat verib.

Əksər hallarda prostat xərçəngi yavaş inkişaf edir və çox vaxt heç bir müalicə tələb etmir. Buna görə də, yeni tədqiqatın müəlliflərinin fikrincə, 76 yaş və daha yuxarı kişilərdə bu xəstəliyin skrininqinin xeyrindən çox zərəri var. Cərrahiyyə və ya radiasiya müalicəsi sidik qaçırma, rektal qanaxma və cinsi disfunksiyaya səbəb ola bilər. Bu nəticələr asemptomatik prostat xərçəngi ilə yaşaya biləcək yaşlı insanların həyat keyfiyyətini əhəmiyyətli dərəcədə azaldır.

Müəlliflər qeyd edirlər ki, "Əgər bir kişi yaşına görə daha 10 və ya 15 il yaşamağa ümid etmirsə, skrininqlə onun həyatını prostat xərçəngindən xilas etməyəcəksiniz, lakin onu müalicə ilə bağlı potensial risklərə məruz qoymuş olacaqsınız".
Bununla belə, hər bir konkret halda prostat vəzi xərçənginin müayinəsi barədə qərar xəstə ilə həkim arasında risklər və faydalar müzakirə edildikdən sonra fərdi olaraq qəbul edilməlidir.

68 yaşlı kişi üçün faydalı olan 75 və ya 85 yaşlı kişi üçün faydasız və ya zərərli ola bilər. Bu səbəbdən 65 yaş və daha yuxarı qadınlarda və kişilərdə sidik yollarının infeksiyaları üçün müntəzəm müayinələr etmək tövsiyə edilmir, əgər onlar hər hansı əlamətlər hiss etmirlər: mikroblarla mübarizə aparmaq üçün antibiotik qəbul etmək allergik reaksiyalara və ishala səbəb ola bilər. Onlar həmçinin gələcəkdə ağır infeksiyalara səbəb ola biləcək antibiotiklərə davamlı bakteriyaların yaranmasına kömək edirlər.

Eyni şəkildə, qocalıqda şəkərli diabet diaqnozu qoyulması və insulin və ya digər dərmanlarla müalicə olunması qan şəkərinin təhlükəli dərəcədə aşağı düşməsi riskini artırır. Buna görə də, bir çox elm adamı yaşlı insanlarda diabet üçün skrininqin faydalılığına şübhə edir.