"Bütün siyasi analitiklərin, ekspertlərin birmənalı mövqeyi ondan ibarətdir ki, cənab İlham Əliyev bu gün nəinki öz xalqının qürur mənbəyi olan böyük rəhbərdir, Azərbaycan Prezidenti həm də qlobal miqyaslı şəxsiyyət, dünyanın ən nüfuzlu liderlərindən biridir. Onun iştirak etdiyi tədbirlər, görüşlər, nitq və çıxışları sadəcə Azərbaycan ictimaiyyəti üçün gündəmi təyin etmir. Dövlətimizin başçısının təşəbbüsləri, beynəlxalq ictimaiyyətin də ciddi maraq və müzakirələrinə səbəb olur".
Bu fikirlər Milli Məclisin sədri Sahibə Qafarovanın "Azərbaycan" qəzetində dərc olunmuş "Qüdrətli Azərbaycanın və Böyük Zəfərin müəllifi" sərlövhəli yazısında yer alıb. Məqalədə Prezident İlham Əliyevin qətiyyətli lider olduğu vurğulanaraq, xatırladılır ki, Azərbaycanın dövlət başçısı beynəlxalq münasibətlər sistemində özünə yer tutmuş şantajla, təhdidlə dövlətlərin milli siyasətlərinə təsir göstərməyə vərdişkar olan güc mərkəzlərinə qarşı cəsarətli lider nümunəsi ortaya qoyaraq, milli mənafe və maraqları ən üst səviyyədə müdafiə və təmin etməyə qadir olduğunu nümayiş etdirir: "Dövlətimizin başçısı "Heç kəs bizimlə diktat dili ilə danışa bilməz!" nidasına paralel olaraq, "Azərbaycan rəqabət məkanı deyil, əməkdaşlıq məkanıdır", "Azərbaycan maraqları birləşdirən ölkədir" tezislərini irəli sürərək, bizə dost, tərəfdaş kimi müraciət edən hər kəsə qapımızın açıq olduğunu, Azərbaycanı təzyiqlə özlərinin maraqlarına tabe etmək istəyənlərə isə yerlərini göstərir".
Məqalədə qeyd edilir ki, Prezident İlham Əliyev adını xalqımızın tarixinə parlaq hərflərlə yazdırmış müzəffər sərkərdə, qalib Ali Baş Komandandır. O, Azərbaycan xalqının Vətən və yurd həsrətinə son qoymuş, onun arzularını gerçəkliyə çevirmişdir.
Azərbaycanın son 20 ildə Prezident İlham Əliyevin müəllifliyi ilə yazılan inkişaf salnaməsinin möhtəşəm nailiyyətlərlə, sonsuz zəfərlərlə zəngin olduğunu qeyd edən spiker Sahibə Qafarova yazıb ki, bu tarixin hər bir səhifəsi xalqımızın qürur mənbəyidir. Gözlərimizin önündə Azərbaycan hər gün daha da böyüyür, onun gücü, qüdrəti gündən-günə daha da artır. Azərbaycan öz hədəflərinə doğru inamla və əmin addımlarla irəliləyir. Şübhə yoxdur ki, Azərbaycanı gələcəkdə də parlaq günlər gözləyir: "Hər bir azərbaycanlıda bu əminliyi, bu sarsılmaz inamı yaradan isə möhtərəm Prezident İlham Əliyevdir. Ona görə də biz cənab İlham Əliyevin Azərbaycanda hakimiyyət olimpinin zirvəsinə seçildiyi 2003-cü ilin 15 oktyabr tarixini, onun xalqımızın dövlətçilik tarixində yeri və rolu barədə danışarkən, ölkəmizin müasir, müstəqil inkişaf mərhələsində müstəsna əhəmiyyətə malik, taleyüklü təqvimlərdən biri kimi dəyərləndiririk".
Prezident İlham Əliyevin seçkilərdə əldə etdiyi parlaq qələbədən sonra "Mən hər bir azərbaycanlının prezidenti olacağam", "Mən yaxşı prezident olacağam” deyə xalqımıza vəd verdiyini xatırladan Sahibə Qafarova qeyd edib ki, bu gün biz müasir, qüdrətli Azərbaycanın, onun liderinin timsalında dövlətimizin başçısının bütün digər vədləri kimi, bu vədinin də həyatda əksini tapdığını aydın şəkildə görürük. Hər bir azərbaycanlının qürur duyduğu, fəxr etdiyi ən yaxşılardan yaxşısı olan lideri, prezidenti var. O, nəyi, necə, nə vaxt etmək lazımdır, bunu hər kəsdən yaxşı bilir, bütün məsələlər dövlətimizin başçısının iradəsi ilə zamanında həllini tapır.