Ermənistanın xarici işlər naziri Ararat Mirzoyan bu gün Minskdə keçirilən KTMT iclasının əvəzinə Aİ səfirləri ilə İrəvanda görüşmək qərarına gəlib.

Ermənistan Xarici İşlər Nazirliyinin mətbuat xidməti bildirib ki, Mirzoyan Aİ-yə üzv ölkələrin bu ölkədə akkreditə olunmuş səfirləri ilə görüşündə İrəvanın regionda sabitlik və sülhün bərqərar edilməsinə dair yanaşmalarını bölüşüb.

Mirzoyanın sözlərinə görə, onlar əsas prinsiplərə əsaslanır və bu, oktyabrda Qranadada keçirilən dördtərəfli görüşün yekunları üzrə qəbul edilmiş bəyanatda da öz əksini tapıb. Söhbət ərazi bütövlüyünün qarşılıqlı tanınmasından, sərhədlərin delimitasiyası və demarkasiyasından, eləcə də kommunikasiyaların bloklanmasından gedir.

Mirzoyan həmçinin logistik kommunikasiyaların blokdan çıxarılması, eləcə də regionda faydalı əlaqələrin formalaşdırılması kontekstində “Dünyanın kəsişməsi” təşəbbüsünü təqdim edib.

Həmsöhbətlər regional təhlükəsizlik məsələlərinə toxunub, Ermənistan-Aİ gündəliyi və İrəvan ilə Brüssel arasında siyasi dialoqun dərinləşdirilməsi ilə bağlı fikir mübadiləsi aparıblar.

Tərəflər həmçinin bu yaxınlarda Brüsseldə baş tutan Ermənistan-Aİ siyasi və təhlükəsizlik məsələləri üzrə ikinci yüksək səviyyəli görüşü və Aİ-nin Ermənistandakı müşahidə missiyasının fəaliyyətini müzakirə ediblər.

Ermənistan-Avropa İttifaqı hərtərəfli və genişləndirilmiş tərəfdaşlıq sazişinin icrasına da toxunulub. Bununla bağlı nazir Ermənistan üçün viza rejiminin liberallaşdırılması üzrə dialoqun başlanması ətrafında müsbət dinamikanın vacibliyini qeyd edib.

Mirzoyan həmçinin “Ermənistana məcburi köçkün düşmüş Dağlıq Qarabağ ermənilərinin ehtiyac və hüquqlarının təmin edilməsinin və bu istiqamətdə atılan addımların” vacibliyinə toxunub.