ABŞ və Ukrayna hakimiyyəti kiçik modul tipli reaktor tikmək barədə razılığa gəlib. Layihə Ukrayna ərazisində özəl Amerika şirkətləri tərəfindən həyata keçiriləcək.

Azadmedia.az Kommersant-a istinadən xəbər verir ki, razılaşmalar noyabrın 12-də BMT-nin 27-ci iqlim konfransında əldə olunub. Niyyətləri rəsmi olaraq ABŞ prezidentinin iqlim dəyişikliyi üzrə xüsusi nümayəndəsi Con Kerri və Ukraynanın energetika naziri Herman Qaluşenko bəyan ediblər.

Layihənin təfərrüatlarını Ukraynanın ABŞ-dakı səfiri Oksana Markarova “Facebook”da açıqlayıb.

Pilot layihədə iştirak edən tərəfdaşlar Arqon Milli Laboratoriyasının beynəlxalq konsorsiumu, Enerqoatom, Ukrayna Milli Təhlükəsizlik və Müdafiə Şurası və Nüvə və Radiasiya Təhlükəsizliyi üzrə Dövlət Elmi-Texniki Mərkəzidir.
Kiçik modul reaktorlar hər bir enerji bloku üçün 300 MVt(e)-dən az istehsal edən müasir nüvə reaktorlarıdır ki, bu da ənənəvi nüvə enerjisi reaktorlarının istehsal gücünün təxminən üçdə birini təşkil edir.

Kiçik modul reaktorları böyük atom elektrik stansiyalarının tikintisinin mümkün olmadığı çətin əldə edilən yerlərdə quraşdırmaq olar.