Mingəçevir Şəhər İcra Hakimiyyəti tərəfindən elan edilən “Xüsusi texnikaların və texnikalara qoşqu avadanlıqlarının satınalınması” üzrə tender ləğv olunub.

Azadmedia.az xəbər verir ki, satınalmanın ləğv edilməsinə səbəb qanunvericilikdə nəzərdə tutulmuş minimum iştirakçı sayının təmin olunmaması olub. Qanuna əsasən, tenderdə iştirak üçün təklifi, təklifin təminatını təqdim etmiş və müvafiq lisenziya və icazəyə malik olan təchizatçıların sayı ən azı üç olmalıdır. Lakin bu dəfə müraciət edənlərin sayı tələb olunan həddən az olduğu üçün müsabiqənin davam etdirilməsi mümkün olmayıb.

Məlumata görə, tenderin ehtimal olunan dəyəri 275 min 653,92 manat təşkil edirdi. Müsabiqə 6 avqust 2025-ci il tarixində elan edilmiş, təkliflərin qəbulu isə 28 avqustda başa çatmışdı.

Mingəçevir Şəhər İcra Hakimiyyətinin qərarına əsasən, bu səbəbdən müsabiqə baş tutmamış elan olunub.