Cari ilin 25 mart tarixində Korrupsiyaya qarşı Avropa Tərəfdaşları Təşkilatı (EPAC) və Korrupsiyaya qarşı Avropa Ələqələndiricilər Şəbəkəsi (EACN) tərəfindən videkonfrans formatında Avropa Birliyində Dürüstlük İşçi Qrupunun “Dürüstlük və anti-korrupsiya standartları” üzrə alt-işçi qrupunun ikinci iclası keçirilmişdir.
Avropa İttifaqının 11 üzv dövlətinin nümayəndələrinin də iştirak etdiyi tədbirdə ölkəmizi Azərbaycan Respublikasının Baş prokuroru yanında Korrupsiyaya qarşı Mübarizə Baş İdarəsinin Təşkilati və informasiya təminatı idarəsinin rəis müavini İsfəndiyar Hacıyev təmsil etmişdir.
Alt-işçi qrupunun II iclasında iştirakçı ölkələrin nümayəndələri tərəfindən korrupsiyanın qarşısının alınmasında mühüm əhəmiyyət kəsb edən dövlət idarəetməsində dürüstlük və etik davranış sahələrində əldə edilmiş müsbət təcrübə mübadiləsi keçirilmiş, eyni zamanda dürüstlük və anti-korrupsiya standartları üzrə hazırlanmış metodik tövsiyələrin layihə mətnləri ilə bağlı müzakirələr aparılmışdır.
Tədbirdə nümayəndəmiz çıxış edərək ölkəmizdə həyata keçirilməkdə olan, dövlət qulluqçularının fəaliyyətində hesabatlılıq və dürüstlüyün təmin edilməsinə istiqamətlənmiş islahatlar barəsində danışmışdır. Bundan başqa, o, son dövr ərzində Azərbaycanda Respublika Prokurorluğunun işində və prokurorların fəaliyyətində dürüstlüyün təmin edilməsi üçün görülmüş tədbirlər barədə iştirakçıları məlumatlandırmışdır.
İclasın sonunda iştırakçı ölkələrin nümayəndələri tərəfindən dürüstlük və anti-korrupsiya standartları üzrə hazırlanmış metodiki tövsiyələrin layihə mətnlərində bir sıra dəyişiklik edilərək tövsiyələrin EPAC/EACN-nin növbəti illik Peşəkar Konfransı və Baş Assambleyasında təqdim edilməsi barədə qərar qəbul edilmişdir.